ఆంజనేయుల్నే పెళ్లి చేసుకుంటా:అనన్య

ఆంజనేయులే నా భర్త. ఎవరు కాదన్నా ఆయన్నే పెళ్లి చేసుకుంటాను అని దఢ నిశ్చయంతో చెబుతోంది నటి అనన్య. కేరళకు చెందిన ఈ భామ తమిళంలో నాడోడిగళ్, శీడన్, ఎంగేయుమ్ ఎప్పోదుమ్ తదితర చిత్రాల్లో హీరోయిన్‌గా నటించింది. ఈ బ్యూటీ కేరళకు చెందిన ఆంజనేయులు అనే వ్యాపారవేత్తతో ప్రేమలో పడింది. పెద్దల అనుమతితో ఇటీవల వివాహ నిశ్చితార్థం కూడా జరిగింది. పెళ్లి వేదిక కూడా నిర్ణయం అయింది. ఆ తరువాతే ఆంజనేయులు అసలు బండారం బయటపడింది. 

ఆయనకు ఇంతకుముందే పెళ్లయిందని, భార్యకు కూడా విడాకులు ఇచ్చాడని తెలియడంతో అనన్య తండ్రి కోపోద్రిక్తుడయ్యారు. ఆంజనేయులుపై కొచ్చి సమీపంలోని పెరుంబావూరు పోలీసులకు ఆయన ఫిర్యాదు చేశారు. దీంతో అనన్య, ఆంజనేయుల పెళ్లి విషయం వివాదాస్పదమయింది. వీరి పెళ్లి కథ కంచికి వెళుతుందని చాలామంది భావించారు. 

ఇక అసలైన ‘ట్విస్ట్’ ఏమిటంటే ఆంజనేయులు మొదటి వివాహం గురించి అనన్యకు ముందే తెలుసట. తల్లిదండ్రులు వద్దన్నా ఆయన్నే పెళ్లి చేసుకుంటానని చెబుతోంది. ఆంజనేయులుపై తన తండ్రి పెట్టిన కేసును ఉపసంహరించుకునేలా కూడా చేసింది. దీని గురించి అనన్య మాట్లాడుతూ తమ వివాహ విషయం గురించి అసత్య ప్రచారం జరుగుతోందని పేర్కొన్నారు. వదంతుల వల్ల తమ మధ్య అనుబంధం మరింత పెరుగుతుందనే విశ్వాసాన్ని అనన్య వ్యక్తం చేస్తోంది.